Wenceslaus IV. Boemorum rex Gregorio IX. papae gratias refert “pro eo quod vos carissimae filiae vestrae ac praedilectae sorori meae d. Agneti, de ordine pauperum dominarum, nunquam desinitis affectum benevolum impertiri. Nam ista hoc testatur, quod nullas preces vestrae sanctitati se unquam meminit porexisse, quarum mox optabilem effectum a paternitate vestra non fuerit consecuta. Proinde spondeo et promitto, quod exhoc vobis et sanctae Romanae ecclesiae semper promptior et paratior ex animo volo esse in omni necessitate seu opportunitate publica et privata: praesertim si [preces] praedictae specialis filiae vestrae ac dilectissimae sororis meae germanae, quas ipsa vobis porrigere impraesentiarum decrevit intra sacrarium exauditionis vestrae solita benignitate duxeritis admittendas, hoc certum et per omnia ratum habentes, quia per hoc, quod satisfacitis votis eius—me—cum omni virtute mea sub vestram omni respectu redigitis potestatem; nec mirum, quoniam eam, ut verum fatear, sicut conjugem et liberos et universa bona diligo, cunctisque mortalibus praefero in affectu. Datum Pragae anno ab inc. dom. MCCXXXVII, regni nostro anno IX.”