Acts of the convocation

[23v] Convocatio praelatorum et cleri Cantuariensis provinciae facta per reverendissimum in Christo patrem et dominum Dominum Henricum, permissione divina Cantuariensem archiepiscopum, totius Angliae primatem et apostolicae sedis legatum, in ecclesia Sancti Pauli Londoniarum, die Lunae, quinto die mensis Maii anno Domini MCCCCXXImo, indictione tertio decimo, pontificatus sanctissimi in Christo patris et domini nostri Domini Martini, divina providentia papae quinti quarto, et translations dicti reverendissimi patris anno octavo.

Monday 5 May 1421

Quo die Lunae quinto Maii praefatus reverendissimus pater archiepiscopus de hospitio archiepiscopi Eboracensis iuxta Westmonasterium situato, ubi protunc idem reverendissimus pater cum familia residebat, iter arripiens porrexit ad ecclesiam Sancti Pauli praedictam, ibidemque ad summum altare eiusdem ecclesiae missam de Spiritu Sancto pro feliciori expeditione negotii convocationis huiusmodi solemniter celebravit, assistentibus sibi in celebratione eiusdem misse venerabilibus patribus dominis Richardo, Dei gratia Londoniensi, Benedicto Menevensi, Iohanne Landavensi, Edmundo Exoniensi, Iohanne Norwicensi, Iohanne Sarum, Willelmo Bangorensi, Philippo Wigorniensi, Richardo Lincolniensi et Willelmo Lichensi, episcopis. Et finita missa, idem reverendissimus pater archiepiscopus cum dictis confratribus suis episcopis aliisque praelatis et clero provinciae suae in multitudine non modica accessit ad capellam Beatae Mariae dictae ecclesiae Sancti Pauli. Et statim ibidem venerabilis et religiosus vir frater Iohannes Langdon, monachus ecclesiae Christi Cantuariensis, sacrae paginae professor solemniter proposuit verbum Dei, sumpto sibi pro themate: ‘Ventrem meum doleo.' Qua collatione finita, incontinenti de mandato praefati reverendissimi patris lectum fuit certificatorium episcopi Londoniensis praedicti de et super executione mandati domini alias sibi pro huiusmodi convocatione transmissi cuius quidem certificatorii tenor de verbo ad verbum sequitur et est talis:

The certificate of the bishop of London

Reverendissimo in Christo patri et domino Domino Henrico, Dei gratia Cantuariensi archiepiscopo, totius Angliae primati et apostolicae sedis legato, ipsiusve locum tenentibus seu commissariis in hac parte quibuscunque Richardus permissione divina Londoniensis episcopus, oboedientiam et reverentiam tanto patri debitas cum honore. Literas vestras quinto decimo die mensis Martii ultimo praeterito [ 15 March 1421] recepimus tenorem qui sequitur continentes.