Acts of the convocation

[17r] Convocatio praelatorum et cleri Cantuariensis provinciae, facta per reverendissimum in Christo patrem et dominum Dominum Henricum, permissione divina Cantuariensem archiepiscopum, totius Angliae primatem et apostolicae sedis legatum, in ecclesia Sancti Pauli Londoniarum, die Lunae paenultimo die mensis Octobris, anno Domini MCCCCXIXno, indictione tertia decima, pontificatus sanctissimi in Christo patris et domini Domini Martini, divina providentia papae quinti anno secundo, et translationis dicti reverendissimi patris anno sexto.

Monday 30 October 1419

Quo die Lunae, paenultimo Octobris praefatus reverendissimus pater archiepiscopus de manerio suo Lambeth iter arripiens porrexit ad ecclesiam Sancti Pauli praedictam, ibidemque ad summum altare eiusdem ecclesiae missam de Sancto Spiritu pro feliciori expeditione convocationis huiusmodi solemniter celebravit, assistentibus sibi in celebratione eiusdem missae venerabilibus patribus dominis Richardo Dei gratia Londoniensi, [Nichola]216 Bathonensi, Benedicto Menevensi, Iohanne Landavensi, Edmundo Herefordensi, Iohanne Sarum, Willelmo Bangorensi, et Henrico Cicestrensi, episcopis. Et finita missa, idem reverendissimus pater archiepiscopus cum praedictis confratribus suis episcopis aliisque praelatis et clero provinciae suae in multitudine non modica accessit ad capellam Beatae Mariae dictae ecclesiae Sancti Pauli, et statim ibidem coram eis, venerabilis et religiosus vir frater Iohannes Langdon monachus ecclesiae cathedralis Cantuariensis, sacrae paginae professor, laudabiliter proposuit verbum Dei, sumpto sibi pro themate:’ Voca operarios et redde illis mercedem’; qua collatione finita, incontinenti de mandato praefati reverendissimi patris lectum fuit certificatorium venerabilis patris Londoniensis episcopi praedicti de et super executione mandati alias sibi per praefatum reverendissimum patrem pro huiusmodi convocatione transmissi, cuius quidem certificatorii tenor de verbo ad verbum sequitur et est talis:

The certificate of the bishop of London containing the archbishop's mandate and the royal writ

Reverendissimo in Christo patri et domino Domino Henrico, Dei gratia Cantuariensi archiepiscopo, totius Angliae primati et apostolicae sedis legato, ipsiusve locum tenentibus seu commissariis in hac parte quibuscunque, Richardus permissione divina Londoniensis episcopus, oboedientiam et reverentiam tanto patri debitas cum honore. Literas vestras septimo die mensis Septembris ultimo praeteriti [7 September 1419], cum reverentia qua decuit, recepimus tenorem qui sequitur continentes:

Henricus, permissione divina etc., venerabili fratri nostro Domino Richardo, Dei gratia Londoniensi episcopo, salutem et fraternam in Domino caritatem.