Edwardus, Dei gratia rex Angliae et Franciae et dominus Hiberniae, venerabili in Christo patri Iohanni, eadem gratia archiepiscopo Cantuariensi, totius Angliae primati, salutem. Volentes pridem condescendere precibus et persuasionibus ex parte sanctissimi patris Domini Clementis papae sexti per literas et nuntios nobis factos de pace seu treugis cum adversario nostro Franciae ineundis paratos nos obtulimus ad tractandum cum deputandis per dictum adversarium de praemissis et propter hoc alligatis nostris literas et nuntios transmisimus speciales, sed dictus adversarius noster qui violatis treugis prius initis fideles nostros depraedare fecerat et interficere tractatum pacis declinavit in nostri et nostrorum subversionem coniurans pro viribus et conspirans, propter quod desiderantes tarn discriminosis periculis nobis ac regno nostro Angliae et Ecclesiae Anglicanae (nisi Deus avertat) obviare, magnum exercitum armatorum ad reprimendum ipsius adversarii nostri malitiam et pro defensione nostri regni et ecclesiae praedictorum necessaria iam ad partes transmisimus transmarinas. Nos etiam passagium nostrum versus partes illas propter hoc ordinavimus sicut oportet validum et festinum, et quia super his et aliis nos ac statum et regimen dicti regni defensionem et honorem dictae ecclesiae et utilitatem reipublicae summe tangentibus ut communibus periculis per consilia communia obvietur, consilium, auxilium et avisamentum vestrum et suffraganeorum vestrorum ac cleri vestrarum diocesium et provinciae habere volumus evicino. Specialiter vos rogamus et in fide et dilectione quibus nobis tenemini vobis iniungimus et mandamus quod ad sextum diem post festum Sancti Michaelis proximo futurum [5 October 1342] dictos suffraganeos vestros et clerum in ecclesia Sancti Pauli Londoniarum convocari faciatis. Ita quod vos et ipsi sitis tune ibidem super praemissis cum deputandis per nos si praesentes non fuerimus, tractaturi et vestra consilium et auxilium impensuri, ulteriusque facturi quod tune ibidem contigerit ordinari, et hoc sicut nos et honorem nostrum diligitis, nullatenus omittatis.