The archbishop's writ of summons to the bishop of Durham for 20 January

Willelmus, permissione divina Eboracensis archiepiscopus, Angliae primas, venerabili fratri Domino Ludovico, Dei gratia Dunelmiae episcopo salutem et fraternam in Domino caritatem. Iuxta sanctiones canonicas esse novimus constitutum ut qui intra ecclesiam positi disciplinam ecclesiasticam contemnentes per censuram ecclesiae compesci nequeunt, regum severitate et rigore principum conterantur. Et sicut Christiani principes pro aeterna vita pontificibus et sacerdotibus indigent, sic quoque pontifices pro successu rerum temporalium et ecclesiae Dei in statu orthodoxae fidei conservandae regum et imperatorum opportunis noscuntur auxiliis indigere. Sane attendentes quod serenissimus princeps dominus noster Dominus Edwardus, Dei gratia rex Angliae illustris ad repellendas Scotorum inimicorum suorum capitalium versutas insidias, ipsorumque malitias multiplices et notorias, Deo adiuvante, reprimendas ad partes Scotiae pro defensione regni sui et Ecclesiae Anglicanae cum copiosa multitudine armatorum in proximo proponit dirigere iter suum; nosque una vobiscum in parliamento proximo in civitate Eboracensi habito ex parte eiusdem domini nostri regis cum magna simus instantia requisiti, quod vos et clerum nostrae dioecesis et provinciae, qui propinquiores sumus periculo imminenti, efficaciter inducamus, ut ab eodem clero sibi ex praemissa causa competens subsidium concedatur, necessitate instante non modica perurgente, quod absque convocatione praelatorum et cleri nostrarum civitatis et dioecesis et provinciae non poterit adimpleri; tenore praesentium vos citamus et per vos, priorem ecclesiae vestrae Dunelmensis et capitulum eiusdem uno, universos abbates, priores abbates non habentes, exemptos et non exemptos, ipsorumque conventuum archidiaconos, decanos etiam et praepositos ecclesiarum collegiatarum, necnon capitula ispa totumque clerum, videlicet civitatis et dioecesis, citari volumus et mandamus, quatenus vos, abbates, priores, decani, archidiaconi et praepositi personaliter, conventus et capitula ac collegia singula per procuratores singulos, clerusque cuiuslibet archidiaconatus vestrarum civitatis et dioecesis per duos procuratores idoneos et sufficienter instructos ac plenam et sufficientem potestatem ab ipsis conventibus, capitulis, collegiis, ac clero habentes, in ecclesia nostra Eboracensi in octabis Sancti Hilarii proxime fiituris [20 January 1319] compareatis et compareant coram nobis ad tractandum in dicta convocatione nobiscum et cum ceteris praelatis et procuratoribus cleri nostrarum civitatis, dioecesis et provinciae super negotio antedicto, ac ad faciendum ulterius super illo quod communi videbitur iudicio faciendum. De die vero receptionis praesentium et qualiter hoc nostrum mandatum fueritis executi, necnon de nominibus abbatum, priorum, archidiaconi, conventuum et capitulorum dictorum, nos citra dictum diem certificantes distincte et aperte per vestras patentes literas harum seriem continentes.