Dat di wilde man gedihtet hat.

der heilige geist gab im den rat,

da alle duget ane gescit.

allein inkan er der buche nit,

iz nemeistiret di godis craft,

di giveth di wisheit unde maht.

so wer einir dugede wil biginnen,

he sal is an den heiligen geist gesinnen,

so machet he dat ende guot,

also warliche so he Moisese sterkete sinen muot

inde wisede alliz was her sprach,

do er in ‹in› dem vure sach.

he leste och Kidionis bete

di luzel gudes durch in dete.

idoch so gab er ime di maht

dat er wider Philisteum vaht.

Her lerte den esel dat er sprach

und och dat er den engel sach.

maniger dugende hat er me,

do er uppe Davidin virze,

unde virgab ime sine missetat;

unde wiste Salome den rat,

daz he screif di wisheit allin sinen lif

idoch he ‹hadde› me dan dusint wif;

und Austri machede wis unde riche,