Sizukulwane sosizi,

Nin’ enihulelwe phansi

Yizinkambiso zomhlaba –

Bhekani nank’ amathunzi

Angigubuzele njalo,

Edatshulwa ngamazibu

Akhombis’ ukuth’ umhlaba

Unokwaw’ ukuphenduka.

Ziyadlul’ izinto zonke,

Akukho busuku bumi,

Kumelwe kuphum’ ilanga.

Nomuthi kakhukhunathi

Unobud’ obungayiwa,

UMninimandlawonke

Uyawuboph’ enhlamvini

Encanyan’ eyisigubhu,

Kuth’ izithombo zokhula

Nokuhluma kway’ imbuya,

Kusheshe ngommangaliso.

Hlalani nigozobele,

Nilindele amathuba

Omthunz’ oqabulisayo.

Nisukume ngale nkathi

OPhezul’ ayimisile

Ngesakh’ isikhathi wathi:

“Niyosukuma ninqobe

Ukuphenduka konyaka

Nokugubhuka kolwandle.”

Izigigaba zomuntu,

Kuyo yonk’ impilo yakhe,

Ziphethwe uSimakade

Okumise ngamathuba

Konk’ ukuhamba komuntu.

Mhla sizalwa sazalelwa

Ubunzima nezimiso

Ezingenakuguquka,

Kuthi lowo nayilowo

Asin’ adedel’ abanye,

Abedlulela phambili

Laph’ engazi ndlela khona

KwaNganekwan’ ingaxoxwa.

Kaningi ngibon’ ukuwa

Kwamakhos’ ekhulekelwa,

Nabanumzane bebusa,

Nezicebi zithokoza,

Namakhosan’ edl’ amafa;

Yebo, bewa bengavuki.

Ngiye ngibon’ esontweni

Laph’ ubuk’ emangcwabeni,

Umhlabath’ ufana wonke

Wembes’ indoda nomfazi

Nensizwa namaqhikiza,

Kungekho mehluko ndawo.

Phezulu kushay’ umoya

Nokuthul’ okuphezwa

Zinyoni zemini yodwa

Nezikhova zobusuku.

Sebakhuluma bayala

Basitshela ngokukholwa.

Lowo mnyam’ esiwubona

Sibhacisa ngaw’ ububi,

Yimizindlo yokwesaba

Ebalekel’ ukulunga;

Yiz’ izithombo zokhula

Nameva emihluhluwe

Abhangazel’ ukukhula.

Kufik’ ilanga lishise,

Kepha leyo mith’ emkhulu

Iqhekeza njal’ ithunzi,

Ingenisa inkanyiso yelanga.