Ngimbeleni ngaphansi kotshani

Duze nezihlahla zomnyezane,

Lapho amagatsh’ eyongembesa

Ngamaqabung’ agcwel’ ubuhlaza.

Ngozwa nami ngilele ngaphansi

Utshani ngaphezulu buhleba:

“Lala sithandwa, lal’ uphumule.”

Ngimbeleni phezu kwamadamu

Laph’ amanz’ ethul’ enganyakazi,

Nalaph’ izinyon’ ezincanyana

Zihlabelela zisho ngephimbo

Zenanel’ ukwethwasa kwehlobo,

Zehle ziphuz’ amanz’ apholile

Laph’ ilanga lingenakushisa.

Ngiyeke ngifel’ ezindleleni

Zabantwan’ abafund’ isikole

Njengob’ amahlomb’ esehluleka

Yimithwal’ ebengisindwa yiyo.

Iyona misindo yabantwana

Eduduza imiphefumulo

Elel’ ukulal’ okuphakade.

Ngimbeleni endawen’ enjena:

Laph’ izinsungulo zezilimi

Zenkathazo zingenakuthola

Sango lokwahlukanis’ umhlaba,

Zingivus’ ebuthongweni obuhle.

Uma wen’ ofunda le migqana

Ungifïca, ungimbele lapho

Utshani ngaphezulu buyothi:

“Lala sithandwa, lal’ uphumule.”