Swer an rehte güete

wendet sîn gemüete,

dem volget sælde und êre.

Des gît gewisse lêre

künech Artûs der guote,

der mit rîters muote

nâch lobe kunde strîten.

Er hât bî sînen zîten

gelebt also schône

daz er der êren krône

dô truoc, und noch sîn nam treit.

Des habent die wârheit

sîne lantliute:

si jehent, er lebe noch hiute.

Er hât den lop erworben,

ist im der lîp erstorben,

sô lebt doch iemer sîn nam.

er ist lasterlîcher scham

iemer vil gar erwert,

der noch nâch sînem site vert.

Ein rîter der gelêrt was

und ez an den buochen las,

swenner sîne stunde

niht baz bewenden chunde,

daz er ouch tihtens pflac –

daz man gerne hoeren mac,

dâ chêrt er sînen vlîz an.

Er was genant Hartman

und was ein Ouwære:

der tihte diz mære.

Ez het der künech Artûs

ze Karidôl in sîn hûs

zeinen pfingesten geleit

nâch rîcher gewonheit

eine alsô schoene hôchzît,

daz er dâ vor noch sît

deheine schoener nie gewan.

Deiswâr dâ was ein boeser man

in vil swachem werde,

wande sich gesamenten ûf der erde