Zinesithunz’ izinwele zakho!

Zibik’ imigwaqo yeminyaka,

Ziland’ inkambo yobudala,

Zingivus’ umunyu nomona.

Ngiyazifisa, zingisus’ isizungu.

Linenzulu lelokhanda lakho!

Ngibe ngiyafak’ ubhoko ngizwa

Ukujula kwalo, ngingagquli phansi.

Naw’ ulokhu wathula ungangazi,

Nami kulukhun’ ukukusukela

Ngingakwazi, kodwa ngiyakuthanda.

Endlebeni yakho ngibona lapho

Kwahamba khon’ uphawu lukaZulu.

Namhl’ iziqhaza zokuhloba

Uzikhiphile wazilahla phansi;

Awazi nalapho zasala khona,

Namanxiwa lapho zawa khona.

Emehlwen’ akho ngifund’ usizi.

Nentshengul’ obhema ngayo

Ngiyibon’ ikukhiphis’ unyembezi

Emehlwen’ akho achiphizayo.

Umqondo wakho kawusekho lapha,

Namehl’ akho abuka kude.

Kukude ezihlangwini zawoShaka

Phansi ezizibeni zikaDukuza,

Lapho amanzi ezonzobele khona

Ngamakhand’ amadoda nemizi yawo:

Nawo asengwevu njengawe phansi.

Njengob’ ugqolozele nje, ngiyabona

Ukhuluma nezingengelezi zikaZulu.

Chathazela min’ engizobhala phansi

Okuzwayo nokukhulunywayo nokubonwayo

Ezweni lezimpunga nelokhokho.

Ngilangazel’ ukuzwa nokuqonda.

Nom’ ungangiphenduli nsizw’ endala,

Zinesithunzi izinwele zakho,

Ngiyazithanda, zingivus’ umona.