Henricus, Dei gratia rex Angliae et Franciae et dominus Hiberniae, venerabili in Christo patri Henrico, eadem gratia archiepiscopo Cantuariensi, totius Angliae primati, salutem. Quibusdam arduis et urgentibus negotiis nos statum regni nostri ac honorem et utilitatem Ecclesiae Anglicanae intime concernentibus vobis in fide et dilectione quibus nobis tenemini rogando mandamus, quatenus praemissis debito intuitu attentis et ponderatis universos et singulos episcopos Cantuariensis provinciae ac decanos et priores ecclesiarum cathedralium abbates et priores ac alios electivos, exemptos et non exemptos, necnon archidiaconos, capitula, conventus et collegia totumque clerum cuiuslibet diocesis eiusdem provinciae ad comparendum coram vobis in ecclesia cathedrali Sancti Pauli Londoniarum, vel alibi prout melius expedire videritis, decimo sexto die mensis Aprilis proximo futuro [16 April 1442] more solito convocari faciatis ad concordandum, tractandum, consentiendum et concludendum super praemissis et aliis quae sibi clarius exponentur tune ibidem ex parte nostra. Et hoc sicut nos et statum dicti regni nostri ac honorem et utilitatem ecclesiae praedictae diligitis nullatenus omittatis. Teste Humfredo duce Gloucestrensi custode Angliae apud Westmonasterium, vicesimo sexto die Ianuarii anno regni nostri vicesimo [26 January 1442].