Dumani mishini yezinkomponi,

Nidume ngesokusa lize lishone.

Ngizovuka, musani ukungibelesela.

Dumani mishini ningalaleli

Ukugquma kwezisebenz’ ezimnyama,

Ziqaqanjelwa ngamanxeb’ omzimba,

Nezithubula zomoya zifuthelene,

Insila yomjuluko inuk’ emzimbeni,

Inqulu yenu niyithintitha kuthi do.

Memeza mfan’ omdala kukude,

Kukude lapho wabunjwa khona,

Washisw’ emlilweni, kwavuthwa

Wena kwasal’ amalahle wathunyelwa,

Sakubon’ uwel’ amanz’ olwandle.

Wathwalwa ngononjinjikazi bezwe,

Bakushushumbisa bakusa laph’ eGoli.

Wakhala mhlathize kwaqhamuka,

Kuvela macal’ onke izimbila.

Izimbila zabambala mnyama,

Zaswel’ imisila, wazithatha

Wazigqum’ emgodini wazisenga.

Guqukani masondo ezinsimbi,

Nalethelwa thina naboshezelwa

Kungekuthanda kwenu nokuzimisela.

Namhla niduma nilokhu nidonse njalo.

Abanye benu ngibabona begqwalile,

Sebalahlwa ngaphandl’ emazaleni.

Lapho ngidlula ngendlela,

Ngiyaguquka ngibheke

Ngicabanga ngithi niyozalana,

Khathisimbe nande; kodwa qha.

Abanewenu nabo bayagqwala

Ngaphakathi ezinkomponi.

Amaphaphu abo aya ngokugqwala,

Bakhwehlele balale bafe.

Pho, nina anikhwehleli ngani?

Ngizwile kuthiwa emgodini

Kuy’ izizwe ngezizwe zikaMnyama.

Yizo lez’ ezivus’ amagqum’ amhlophe

Amangalis’ amathong’ amnyana.

Ngizwile kuthiwa kwakhala

Imishini kwavela mbib’ emnyama,

Emqondweni wayo kuhlwile khuhle.

Yabanjwa yaphendulw’ imvukuzane,

Yavukuz’ umhlabathi ngabon’ iGoli.

Yebo, zivukuzil’ izimvukuzane

Kwavel’ izindundum’ ezimhlophe.

Zafukuzela phansi zakhwela,

Namhla zingangeSandlwana.

Ngizikhwela ngesul’ isithukuthuku,

Ngithi ngiphezulu ngibon’ izikhatha

Zentuthu emhlophe yothuli isuka

Phans’ ezinyaweni zami, ngibheke,

Ngiyibon’ ivimb’ umhlaba wonke.

Dumani mishini yezinkomponi,

Dumani kakhulu nakakhulu.

Vimbezelani ngomsindo singezwakali

Nakuba sikhala sigquma njalo.

Amalungu emizimba yethu adliwa yini.

Gegethekani mishin’ emidala,

Kuhle nisihleka sifuquleka.

Amandl’ enu makhulu niyesabeka.

Ningenza ngokuthanda kwenu, siyavuma.

Sivumile ukuphum’ eqhugwaneni,

Sazoluswa njengezinkabi;

Sashiy’ amabele namasi nobisi,

Sazohlalel’ uphuthu nephalishi.

Buphelile ubunumzane, singabafana.

Siyabona izwe lishay’ ungqimphothwe.

Sivuswa ngesokusa sim’ uhele.

Wake wakubonaph’ ukungcwatshwa

Ubheke ngawo omabili, uzihambela?

Dumani mishini yezinkomponi.

Ngiyavuka kanginwabuzeli.

Ngizongena phansi komhlaba

Ngiyoshay’ ijombolo phezu kwetshe.

Naw’ ongaphandle ongangizwayo,

Uyobona ngakho ukuthi sengiyalishaya

Ijombolo lomLungu laph’ ubona

Amagaliga nezingolovane ziphuma

Zigcwel’ amatshe amhlophe naluhlaza.

Umfoweth’ uyolithwal’ ipiki,

Nehalavu alibek’ ehlombe

Efak’ amagqukel’ ezinyaweni.

Nay’ angen’ angilandele,

Umhlab’ usigwinye siyovukuza.

Uma ngifile khona ngaphansi

Kuyoba nani?

Ngingubani nje nempela?

Kwasa kusa, mntanomuntu,

Bayagingqika begenuka ngibuka.

Ngingene ngaphansi kwenhlabathi

Kungekho mibhoshongo ekhwele

Engiyibuka ngigebenyeke.

Ngathi ngiyagoduka nemithwalo

Ngashayw’ amahlanga namanxiwa,

Ngenway’ ikhanda ngisangene.

Ngabuz’ umkami nabakhwekazi,

Bangitshel’ umLung’ engimsebenzelayo.

Ngathula ngawuhlab’ inhlali.

Dumani mishini yezinkomponi.

Noma nikude kwaDukathole

Amazw’ enu ahlabay’ emphefumulweni;

Ayancencetha ezindlebeni zami,

Anjengensimbi yethus’ izwakala kude;

Angikhumbuz’ imibhoshong’ emide

Nemicebo, nezicebi engizikhuphulile

Zenyukel’ endlin’ engenhla, zangishiya

Ngigxiz’ amanzi njengengcuba yenkomo.