The archbishop's mandate for the council

Henricus, permissione divina Eboracensis archiepiscopus, Angliae primas et apostolicae sedis legatus venerabili fratri nostro Thomae, Dei gratia Dunelmensi episcopo suffraganeo nostro, eiusve in spiritualibus vicario generali, salutem et fraternam in Domino caritatem. Cum itaque sacrorum canonum edoceant instituta ut per metropolitanos singulos in suis provinciis pro discutiendis cum debita maturitate arduis emergentibus negotiis omni anno provincialia concilia celebrentur, eo tamen praecipue tempore vigilantiori studio convenit huiusmodi concilia convocari, cum emerserint gravia et insolita negotia quae absque plurium peritorum consilio facile nequeunt expediri, unde ex causis praemissis diversis et arduis statum et reformationem ecclesiarum et ecclesiasticarum personarum nostrae Eboracensis provinciae concernentibus ac ob nonnulla alia quae circa generale concilium sanctissimi in Christo patris et domini nostri Domini Martini divina providentia papae moderni in civitate Papien[si] auctoritate statutum et propius celebrandum, nostrum concilium provinciale duximus convocandum. Nos auctoritate nostra metropolitica suffulti vobis venerabilis frater in virtute oboedientiae iniungimus et mandamus, vosque tenore praesentium peremptorie citamus ac per vos priorem ecclesiae vestrae cathedralis Dunelmensis et capitulum eiusdem ac universos abbates et priores proprios abbates non habentes, exemptos et non exemptos, necnon decanos, archidiaconos, praepositos, sacrae theologiae professores ac iuris canonici et civilis doctores, capitula, conventus et colle[l13r]gia, clerumque totius dioecesis vestrae ac civitatis Dunelmensis citari volumus, et mandamus quatenus vos venerabilis frater dictique abbates, priores, decani, archidiaconi, praepositi, professores et doctores personaliter, capitula vero conventus et collegia singula per procuratores singulos, clerusque per duos procuratores sufficienter instructos plenam et sufficientem potestatem ab ipsis obtinentes, compareatis et compareant coram nobis seu nostris commissariis pluribus aut uno in ecclesia nostra cathedrali et metropolitica Eboracensi die Mercurii proximo post festum Sancti Matthaei Apostoli, videlicet vicesimo tertio die mensis Septembris proximo futuri [23 September 1422], cum continuatione et prorogatione dierum sequentium quatenus opus fiierit super proponendis in dicto concilio nostro nobiscum seu nostris commissariis pluribus aut uno una cum aliis praelatis, quos tune ibidem praesentes esse contigerit, tractaturi salubre consilium impensuri ac etiam efficaciter impleturi, ulterius facturi et recepturi quod ibidem pro communi utilitate ecclesiae et cleri divina bonitas concesserit ordinare; praemunientes vos et ceteros per vos citandos praemuniri mandamus quod absentes in termino supradicto, nisi propter evidentes causas et rationabiles de quibus fidem faciant legitime fuerint impediti, tanquam inoboedientes et contumaces iuxta iuris exigentiam puniemus.