HORDEUM, fabae, siligo, pisa, auena, triticum, crescit in modis occultis omne frumenti genus. sed herbarum ista series nescioquid sapit Europaeum:

qua cum uescatur omnium hominum qui sunt in orbe terrarum pars dimidia, cumque eorum qui sunt in orbe numerus semper augeatur, is qui fructu frequentiore certiore meliore donet nonne maximis est gratiis maximisque laudibus dignus?

hic uir inter eos qui ‘maxume quidem gaudent oryza’ natus iam XXX amplius annos experitur quomodo eius frumenti noua seminum genera in uim messemque magis frugiferam colantur. panici forma plantis est, non multo auenae dissimilis; stirps gracilis, et grano suum cuique stamen. disponitur in paludibus manu, adeoque per annos in hominum usu cogitur esse ut ea fortasse quae nunc coluntur semina nisi in debito solo sata uix floreant.

iam diu per saecula uim cognouimus eligendi, inserendi, coniungendi quo qua largius nobis metatur seges, ita ut quae sit uni uirtus seu resistendi caelo seu bestiolis aduersandi seu Robigo Floraeque supplicandi eam alterum frumenti genus traditam habere possit; sed aliquid adhuc et tempori concedendum fuit et fortunae. quanto nunc subtilius et strictius res agatur ex hoc manifestum est quod hic uir non modo diuersa oryzae genera numero amplius CCC diffudit in terras, quorum unum iam per quadringentiens iugerum seritur, sed etiam nouissimum spondet uel abundantiore fructu genus.