De cautionibus doctorum tam in jure canonico quam civili ordinarie legentium procuratoribus exhibendis.

Statuimus et ordinamus quod senior deinceps regens decretorum doctor, si in nostra universitate moram traxerit et legere voluerit, in ultima congregatione regentium ante nativitatem Sancti Johannis Baptistæ coram cancellario vel ejus vicem gerenti et procuratoribus pro toto sequenti anno scholas suæ facultatis conducere teneatur, quibus sic conductis, alteri minime locabit; et de satisfaciendo secundum morem infra sequentis anni spatium et universitati et bedellis realem ipse cautionem ad valorem quatuor marcarum statim in eadem congregatione, priusquam suas scholas conduxerit, in manus alterius procuratorum deponat: quod si non fecerit, nec per se ipsum ordinarie nec per alium omnino legere permittatur. Leget insuper præfatus senior regens per seipsum ordinarie et non per alium per medietatem saltem cujuslibet termini majorem. Quod si lecturam is sponte deserere voluerit, tum senior post eum in eadem facultate regens, qui legere voluerit, forman prædictam firmiter observabit: nec huic unquam statuto derogetur quovis modo, nisi per modum gratiæ cum eodem dispensetur. Statuimus insuper et ordinamus quod in eadem congregatione doctor in jure civili regens qui anno sequenti jura civilia ordinarie legerit, antequam suæ facultatis scholas conduxerit, de satisfaciendo infra annum et universitati et bedellis cautionem ipse triginta trium solidorum et iv° denariorum in unius procuratorum manus deponat realem: quod si facere neglexerit, nec per se nec per alium prorsus ordinarie legere quovis modo permittatur: nec unquam huic statuto derogetur nisi per modum gratiæ cum eo dispensetur.—L. P. S.fol. 52. L.P.J.fol. 80.