THEOLOGIAE scientiarum reginae qui studet difficili paret dominae; nempe errare promptius solent homines quam uera discernere. sed is qui iuuenis amore Dei instinctus rem diuinam altius intellegere latiusque disseminare cupiebat, quid libentius faceret? primo suo libro, theologia praestanti, Scientiae Volnus titulum dedit, uerba a poeta et sacerdote illo Ordouicum mutuatus (neque ipse ab opere poetico abhorret); tunc Arii cuiusdam studio, haeretici uiri, tam periculoso quam utili suscepto librum edidit doctrina densissimum, luce sapientiaque clarissimum.

tot numero libros, libellos, orationes edit, omnesque bonis uerbis boni uiri plenas, ut eum semper philosophari credideris. sed ex aulis bibliothecisque in episcopatum Silurum electus prouinciam illam tanto amore adeoque ipse rursus amatus coluit ut dux omnium Anglicanorum aliquando fieri deberet. et factus est, ingenti cum spe multorum. quae tamen in Ariano libro scripsit forsitan meminerit, ex ambagibus multiplicibus quae potestati apud Christianos exercendae obstent ultimam uideri esse nullam fugam. nec uero ut opinor hic uellet esse, qui si quid ambigitur minime quid sibi, quid cuiuis placeat sed quid bono sit ecclesiae tota re subtilissime et amantissime disceptata petit.

habet episcopis quibus praeest permulta quae tradat, sed plura etiam, qua est auctoritate sapientiae, omnibus eis qui Deum illum unum Abramicum cultibus tam diuersis uenerantur. magnum profecto hoc opus; quo suscepto, uersibus poetae quo nullus in hoc loco magis idoneus qui citetur benedicamus:

praesento uobis Magistrum in Artibus, Academiae Britannicae Sodalem, Reuerendissimum atque Illustrissimum Archiepiscopum Cantuariensem Metropolitanum et Totius Angliae Primatem, Collegiorum de Clare et Christi honoris causa Socium,

STUDENTS of Theology, the Queen of the Sciences, serve a difficult mistress; error is much easier than perception of truth.